Ա տիպի բոտուլինոթերապիան լայնորեն կիրառվող ներարկումային մեթոդ է։ Էսթետիկ բժշկության մեջ այն հիմնականում կիրառվում է դիմախաղային (միմիկական) կնճիռների արտահայտվածությունը նվազեցնելու և դեմքի որոշ հատվածներում մկանային ակտիվությունը ժամանակավորապես թուլացնելու նպատակով։

Բոտուլինոտոքսինի ազդեցությունը զարգանում է աստիճանաբար․ առաջին փոփոխությունները սովորաբար նկատվում են ներարկումից մի քանի օր անց, իսկ առավել արտահայտված արդյունքը ձևավորվում է մոտ 7–14 օրվա ընթացքում։ Ազդեցության տևողությունը անհատական է և սովորաբար կազմում է մոտ 3–4 ամիս, երբեմն՝ ավելի երկար՝ կախված կիրառվող պատրաստուկից, դեղաչափից, մշակվող հատվածից և օրգանիզմի առանձնահատկություններից։

Նախքան միջամտությունը բժիշկը գնահատում է պացիենտի անատոմիական առանձնահատկությունները, մկանների ակտիվությունը, ցուցումներն ու հակացուցումները, ներկայացնում սպասվող արդյունքը և ծանոթացնում տեղեկացված համաձայնության պայմաններին։